Gidala ang garbo ug dungog sa tibuok Cebu Police Provincial Office (CPPO) ni Police Staff Sergeant (PSSg) Jonalyn Lonzaga Olivar human siya makadaog og Gold ug Bronze medals sa World Police and Fire Games 2025 nga gipahigayon sa Birmingham, Alabama, USA niadtong Hulyo 2–3, 2025.
Girepresentar ni PSSg Olivar ang Pilipinas sa maong internasyonal nga kompetisyon ug nakakuha og Gold Medal sa Karate Kumite – Women’s Black Belt (Under 68kg, 30+ category) ug Bronze Medal sa Karate Kata – Women’s Black Belt (35+ category). Dako kini nga kadaugan alang sa kapulisan ug sa nasud.
Matod ni PCOL Christopher M. Bermudez, Acting Provincial Director sa CPPO, dako ang ilang pasalamat ug garbo sa nakab-ot ni Olivar. Gihulagway kini nga usa ka dakong kalampusan ug buhing pamatuod sa disiplina, kusog, ug kadasig sa modernong pulis.
Gidayeg usab ni PBGEN Redrico A. Maranan, Regional Director sa PRO7, ang kalampusan ni Olivar, nga natugma sa iyang panan-awon nga “Makabagong Pulis sa Makabagong Panahon – Respetado ang Mamamayan, Disiplinado ang Kapulisan.”
Mao kini ang usa ka maayong ehemplo nga ang mga pulis dili lang mga tigpanalipod sa katawhan, apan mahimo usab nga kampiyon sa kalibutan pinaagi sa determinasyon ug paningkamot.
Source: CPPO
I via Renante Socia Lada