Aron mapalambo ang serbisyo medikal sa lalawigan, gisugo ni Cebu Governor Pam Baricuatro ang pag-hire og 78 ka mga doktor nga ipakatap sa mga provincial ug district hospitals sa tibuok Sugbo.
Sa pinaka ulahing update, nakadawat na ang Kapitolyo og 1,858 ka aplikasyon alang sa lain-laing healthcare positions. Padayon ang profiling ug screening sa mga aplikante, apan tungod sa kadaghan sa nangaplay, giila nga usa kini ka hagit sa proseso. Bisan pa niana, masaligon ang administrasyon nga ang pagpalig-on sa healthcare system sa probinsya maoy ilang prayoridad.
Gawas sa mga doktor, plano usab sa Kapitolyo nga pun-an ang ubang healthcare personnel sama sa mga nurse, medical technologists, ug uban pang gikinahanglan nga mga staff aron masiguro ang kalidad sa serbisyo sa tanang pasilidad medikal sa lalawigan.
Gilauman nga pinaagi sa dugang medical personnel, mas mapadali ang serbisyo sa ospital ug mas matubag dayon ang mga panginahanglan sa katawhan sa tanang suok sa probinsya.
Padayon ang paningkamot sa Kapitolyo aron ang tanang Sugboanon makadawat og patas, paspas, ug kalidad nga serbisyo medikal.
Source: Cebu Province PIO
I via Renante Socia Lada
#rpndykccebu
#675hzamband
#tandemexpress