Pormal nang adunay akreditasyon sa PhilHealth ang Cebu Provincial Health Office Clinic isip opisyal nga provider sa PhilHealth Konsulta Benefit Program, nga gihimo kining unang provincial health clinic sa Central Visayas nga nakadawat sa maong akreditasyon.
Gihatag ni PhilHealth Regional Vice President Marjorie Cabrieto ang akreditasyon ngadto kang Gobernadora Gwendolyn Garcia atol sa miting nga gipahigayon sa Capitol Social Hall kagahapong adlawa Abril 8, 2025, nga gitambongan sa mga regional ug provincial direktor sa nagkadaiyang ahensya sa gobyerno ug mga miyembro sa Sangguniang Panlalawigan.
Tungod niini, kapin sa 3,000 ka empleyado sa Kapitolyo ug ilang mga dependent makapahilos na og libre nga konsultasyon, laboratory tests, ug tambal ubos sa Konsulta Package nga ihatag direkta sa Capitol Clinic.
Ang Lalawigan sa Sugbo karon mao na ang nanguna sa tibuok nasod sa pinakadaghan nga Konsulta-accredited providers, nga naglakip sa: 62 ka Rural Health Units (RHUs), 23 ka pampublikong ospital (lakip ang 16 nga pagpanag-iya sa Kapitolyo ug 7 nga gipadagan sa LGU), 15 ka pribadong ospital, ug 6 ka ospital nga gipadagan sa Department of Health.
Ang Konsulta Package usa ka programang medikal sa PhilHealth nga naghatag og libre nga outpatient healthcare services alang sa mga miyembro ug ilang dependent. Ilawom niini, ang benepisyaryo mapahimuslan:
Libre nga konsultasyon sa mga accredited nga doktor
Libre nga basic laboratory tests (CBC, urinalysis, fecalysis, blood sugar ug cholesterol screening)
Libre nga tambal para sa hypertension, diabetes, ug hubak.
Preventive health services sama sa risk assessments ug health counseling.
Ang maong lakang usa ka dakong kalampusan sa Capitol Clinic ug dugang nga benepisyo sa mga empleyado sa Kapitolyo ug ilang pamilya.
Source: Cebu Provincial Capitol, PIO
I via Renante Socia Lada
#rpndykccebu