Sa pag-andam sa umaabot nga summer vacation, gipakatap na sa Police Regional Office (PRO) 7 ang ilang gipalig-on nga mga lakang sa seguridad sa tibuok Central Visayas. Gibutyag nga 90% sa mga kapulisan gipakatap na sa mga lugar aron masiguro ang presensya sa kapulisan ug ang paspas nga pagresponde sa tanang emerhensya.
Gipunting ang mga lugar nga aduna’y daghang kalihokan ug daghang tawo tungod sa nagkalain-laing selebrasyon sama sa Philippine Veterans Week, Araw ng Kagitingan, Labor Day, Flores de Mayo, ug ang balaang paghinumdom sa Semana Santa. Gilauman nga molungtad ang taas nga dagan sa mga turista, mga balikbayan, ug mga lokal nga lumulupyo nga motambong sa pista, family reunions, ug uban pang kalihokan, nga makasamot sa kahuot sa karsada, pantalan, airport, ug mga terminal.
Matod ni Police Brigadier General Redrico A. Maranan, Regional Director sa PRO7, nga andam na ang kapulisan sa tibuok rehiyon sa pagpatuman sa kahapsay ug kalinaw sa summer vacation.
Isip kabahin sa ilang proaktibong kampanya, gibalik sa PRO7 ang pahimangno sa publiko nga sundon ang yano nga mga tips sa seguridad:
Likayi ang pagdala og daghang kuwarta o mga mahalon nga butang kon mogawas;
Siguroha nga nakasirado ug luwas ang inyong balay sa wala pa manglakaw;
Likayi ang pagpang-post sa inyong travel plans sa social media;
Itago ug ayaw kalimti ang mga emergency contact numbers;
Sundon ang mga lokal nga lagda ug safety protocols sa mga tourist spots.
Gi-awhag sa PRO7 ang publiko nga maglipay ug maglingaw sa summer vacation nga may kahibalo ug responsibilidad. Gisaad usab sa kapulisan ang padayong pagbantay ug pagpanalipod sa kaluwasan sa komunidad.
Gidapit usab ang tanan nga magbantay sa dugang nga mga pahimangno ug safety advisories sa mosunod nga mga adlaw.
Source: PRO7- PIO
I via Renante Socia Lada
#rpndykccebu