DAVAO CITY — Gimando sa lokal nga kagamhanan sa Davao City ang pagtangtang sa tanang ilegal nga billboards ug signages nga nakabutang sa dakbayan, subay sa Executive Order No. 09, Series of 2025, nga giluwatan isip pagtuman sa usa ka memorandum gikan sa Department of the Interior and Local Government (DILG).
Ang maong lakang nagapasikad sa DILG Memorandum Circular No. 2010-101, nga pinetsahan niadtong Setyembre 23, 2010, nga nagdili sa pagbutang og mga billboards ug signages nga adunay mga ngalan o hulagway sa mga opisyal nga nakadikit sa mga programa sa gobyerno.
Gipasabot sa memorandum nga ang paggamit sa mga billboards para sa personal nga pagpasikat sa mga opisyales usa ka pag-abuso sa katungdanan ug makapaminus sa pag-ila sa tinuod nga kontribusyon sa mga taxpayers.
Tungod niini, gimando a city government ang komprehensibong inspeksyon sa tanang billboards ug signages sa tibuok siyudad aron masiguro nga walay nakalapas sa maong patakaran. Ang mga masakpang naglapas, automatikong baklasan sa mga may katungdang ahensiya.
Gibug-aton sa lungsod ang transparency ug responsible nga paggamit sa pondo sa gobyerno, ug gilauman nga kini nga lakang makatabang sa pagpahiuli sa kredibilidad sa mga pampublikong serbisyo.(Camille Santos Naraga)(Source: PIO)