Nakabawi og 154 ka mobile phone ang Cebu City Police Office (CCPO) atol sa usa ka dakong anti-fencing operation nga gihimo niadtong Enero 20, 2026 sa Leon Kilat Street, Cebu City. Ang operasyon gipangulohan sa CCPO ubos sa pagpangulo ni PCOL George V. Ylanan.
Sa inisyal nga imbestigasyon, nasuta nga dili tanan cellphone nga narekober kay nawala o nakawat atol sa Sinulog Festival. Kadaghanan niini kay gi-report nga nawala kaniadtong 2025, uban pa sa wala pa ug human sa pista. Ang mga cellphone nakit-an ug gitipigan sa iduhang andana sa Aljam Cellphone Accessories sa Leon Kilat Street, diin ang suspek gituohang adunay kahibalo sa pag-abli o pag-unlock sa mga iPhone, hinungdan nga napadayon ang iyang pagtipig sa mga maong unit. Padayon pa karon ang pag-validate sa maong impormasyon.
Nag-andam na ang CCPO sa pagpasaka og kaso batok sa suspek tungod sa paglapas sa Presidential Decree No. 1612 o Anti-Fencing Law, nga nagsilot sa pagtipig ug pagbaligya sa mga kinawat nga butang. Aron matigayon ang pagsampa og kaso, gikinahanglan ang affidavit sa mga biktima, busa gipang-kontak na sila ug gidasig nga motabang sa kapulisan.
Gipahayag sa CCPO ang ilang padayon nga paningkamot sa kaluwasan sa katawhan, pagpugong sa krimen, ug pagpapanubag. Gidasig usab ang publiko nga dayong i-report ang pagkawala o pagkawat sa mga butang ug makigtambayayong sa kapulisan. Ang dugang nga impormasyon ipagawas pinaagi sa opisyal nga CCPO Facebook page.
Source: CCPO
I via Renante Socia Lada