Human sa pagsugod sa impeachment trial ni Vice President Sara Duterte sa Senado kagahapon, nagpahimutang na og andam ang Cebu City Police Office (CCPO) alang sa posibleng deployment sa ilang mga kapulisan kon adunay mga rally o ubang kalihokan nga may kalabotan sa maong proseso.
Sumala ni Police Lt. Colonel Franco Rudolf Oriol, Deputy City Director for Administration sa CCPO, giingnan na ang tanang police stations ug special units nga magpabiling alerto aron dali silang makatubag kon adunay sugo gikan sa Police Regional Office 7 (PRO-7).
Matud pa ni Oriol, hangtod karon wala pa silay namonitor nga dagkong protesta o rally dinhi sa Sugbo nga may kalabotan sa impeachment trial. Miingon usab siya nga wala pa’y opisyal nga mando gikan sa PRO-7 bahin sa dugang nga deployment sa mga pulis.
Bisan pa niini, giandam na sa CCPO ang ilang mga Civil Disturbance Management (CDM) personnel aron andam kon adunay kalit nga kalihokan nga nagkinahanglan og dugang seguridad.
Gipasalig sa CCPO nga magpadayon silang magbantay sa sitwasyon aron masiguro ang kalinaw ug kahapsay sa Cebu samtang nagpadayon ang impeachment trial ni Vice President Sara Duterte.
I via Renante Socia Lada