Aron masiguro ang luwas ug malinawon nga pagsaulog sa holidays, giguba sa Police Regional Office 7 (PRO7) ang mga nakumpiskar nga gidiling pabuto sa Camp Sergio Osmeña, Sr., Cebu City niadtong Disyembre 31, 2025.
Sumala sa datos sa PRO7, kinatibuk-ang 8,584 ka gidili nga pabuto nga nagkantidad og kapin ₱169,352 ang nakuha sa nagkalain-laing lugar sa Central Visayas ug giguba dayon aron dili na magamit o mabaligya pa.
Lakip sa mga gibungkag nga pabuto mao ang Five Star (Big), Piccolo, Kwitis, Giant Bawang, Popop, Boga, Pla-pla, Whistling Mother, Super Yolanda, ug uban pang klase nga gidili sa balaod tungod sa dakong peligro nga mahimo niini sa kahimtangan sa katawhan.
Miingon si PRO7 Regional Director PBGen Redrico A. Maranan nga iyang gimandoan ang tanang police commanders nga palig-onon pa ang kampanya batok sa iligal nga pabuto, ilabi na sa mga merkado ug mga lugar nga kasagaran baligyaan niini.
Gipahimangnoan usab sa PRO7 ang publiko nga likayan ang pagpalit ug paggamit sa gidili nga pabuto ug isumbong dayon sa pinakaduol nga police station ang mga iligal nga namaligya.
Padayon ang PRO7 sa ilang tumong nga mapanalipdan ang komunidad ug malikayan ang mga disgrasya ilabi na panahon sa holidays.
Source: PRO7 PIO
I via Renante Socia Lada