Mokabat na sa 15 ka tawo ang namatay tungod sa mga disgrasya sa kadalanan gikan Enero hangtod Hulyo ning tuiga. Kini ang gibutyag ni CT-TODA Head Jonathan F. Tumulak pinaagi sa iyang open letter ngadto sa publiko.
Matud ni Tumulak, mas taas ang ihap sa mga namatay karong tuiga kumpara sa samang panahon sa miaging mga tuig. Kadaghanan sa mga aksidente giingong tungod sa padalus-dalos nga pagdrayb ug pagmaneho ubos sa impluwensya sa alkohol.
Nanawagan siya sa tanang motorista ug ilang mga pamilya nga magtinabangay aron malikayan ang dugang pang mga aksidente. Giawhag niya ang mga drayber nga magmaneho kanunay nga responsable, siguroong maayo ang kondisyon sa ilang sakyanan, ug magbiyahe lamang kung himsog ang lawas.
Gipahinumdoman usab niya ang mga motorista nga saktohon ang oras sa pagbiyahe aron dili magdali, ug likayan gyud ang pagdrayb kung nakainom og alkohol o nakagamit og ilegal nga drogas. Iyang giingon nga importante usab ang pag-ampo sa dili pa magsugod sa biyahe.
Matud pa ni Tumulak, naglaum ang CT-TODA nga magtinabangay ang publiko sa pagpakunhod sa mga disgrasya sa dalan. Nagpasalamat usab siya sa pagsabot sa mga motorista samtang padayon nga gipatuman sa ahensya ang mga balaod sa trapiko aron mapanalipdan ang kinabuhi sa tanang naggamit sa kadalanan.
I via Renante Socia Lada