Misupota sa Cebu City Police Office (CCPO) sa bag-ong Cebu City Busking Program nga gilunsad kagahapong adlawa Agosto 28, 2026 sa Senior Citizens Park, Cebu City. Ang programa gipasiugdahan sa Cebu City Government ubos sa pagpangulo ni Mayor Nestor C. Archival.
Mitambong sa paglunsad si PCOL Ricky C. Sumalde, Acting City Director sa CCPO, ug mipadayag sa iyang suporta sa programa. Matud niya, ang busking usa ka maayong paagi aron mapakita sa mga Cebuano ang ilang talento, pagkamamugnaon ug gugma sa musika ug arte.
Gipasabot usab ni Sumalde nga ang maong programa makatabang sa paghiusa sa komunidad kay naghatag kini og luwas ug maayong lugar diin ang mga tawo mahimong magtapok ug malingaw sa talento sa mga lokal nga performer.
Gisaad sa CCPO ang padayong pakigtambayayong sa Cebu City Government, mga performer ug komunidad aron mapadayon ang kalinaw, kahapsay ug seguridad sa maong mga kalihokan ug masiguro nga luwas ug malingaw ang tanan.
📸 CCPO
I via Renante Socia Lada