Nadakpan sa kapulisan sa Cebu City Police Office o CCPO ang tulo ka suspek nga giingong nalambigit sa pagpamusil patay sa usa ka babaye sa Sitio Miñulida, Barangay Calamba, Cebu City, atol sa gihimong hot-pursuit operation.
Base sa report, nakadawat og impormasyon ang Police Station 6 alas 5:50 sa hapon niadtong Mayo 21, 2026 mahitungod sa usa ka babaye nga gipusil ug nasamdan sa maong lugar. Dali nga mitubag ang mga pulis ubos sa pagpanguna ni PCPT Noah Labra Añana ug PLT Fredilson Montero Codilla aron seguruhon ang lugar ug sugdan ang imbestigasyon.
Gidala dayon ang biktima ngadto sa Cebu City Medical Center alang sa pagpatambal apan gideklara nga patay sa doktor alas 5:51 sa hapon sa maong adlaw.
Human sa insidente, gilusad dayon sa Police Station 6 ug Tactical Motorcycle Riding Unit o TMRU sa CCPO ang padayon nga operasyon ug imbestigasyon aron mailhan ang mga responsable sa krimen. Wala pay 24 oras gikan sa hitabo, nadakpan ang tulo ka suspek alas 8:50 sa buntag kagahapon Mayo 22, 2026.
Lakip sa mga nadakpan ang giingong gunman, ang tawo nga nagtago sa armas nga gigamit sa pagpamusil, ug ang giingong spotter o lookout.
Narekober usab sa operasyon ang usa ka caliber .45 pistol nga gituohang gigamit sa krimen uban ang magazine nga adunay duha ka buhing bala, ug usa ka blue Oppo A16 cellphone nga gipanag-iya sa biktima.
Sa imbestigasyon sa kapulisan, giingong may kalabotan sa ilegal nga drogas ang motibo sa krimen human kuno napakyas ang biktima sa pagbayad sa gituohang shabu.
Ang mga nadakpan karon anaa na sa kustodiya sa Police Station 6 samtang giandam ang mga kasong ipasaka batok kanila ug nagpadayon pa ang dugang imbestigasyon aron mailhan ang ubang posibleng nalambigit sa insidente.
📸 CCPO
I via Renante Socia Lada