Sa laing paagi sa pagsaulog sa Valentine’s Day, ang Cebu Provincial Government nagpahigayon og seminar sa Kapitolyo aron tabangan ang mga batan-on nga mas masabtan ang kalainan sa “like,” “love,” ug “lust.”
Ang maong kalihokan nga gipahigayon didto sa Capitol nagdala og daghang kabatan-onan nga mitambong sa diskusyon nga nag-ulohang “The Psychology of Affection: Exploring Like, Love, Lust in Human Behavior.” Tumong niini nga mapalambo ang kahibalo sa kaugalingon sa mga batan-on ug matabangan sila sa paghimo og husto ug maayong desisyon sa ilang mga relasyon.
Ang diskusyon gipangulohan ni Dr. Brian To, usa ka iladong global strategist ug Senior Practice Professor of Strategy Leadership. Mitambong usab si Gob. Pamela Baricuatro ug mihatag og mensahe ngadto sa kabatan-onan.
Sa iyang pakigpulong, giingon sa gobernador nga ang gugma dili lang kutob sa mga bulak, tsokolate, ug romantiko nga surpresa. Matud pa niya, mas lawom ang kahulugan sa gugma ug naglakip kini sa pag-atiman, pagsabot, ug pagdawat sa usa’g usa.
Isip lider sa probinsya ug usa ka inahan, gipasiugda niya ang kamahinungdanon sa pagdawat sa kaugalingon ug pagkamatinud-anon sa bisan unsang relasyon. Matud pa niya, ang matag tawo angay nga makita, hatagan og bili , ug dawaton, ug dili kinahanglan mangita og laing personalidad aron lang higugmaon.
Gipunting usab ni Gob. Baricuatro nga ang pagdumala sa gobyerno dili lang kutob sa pagtukod og dalan ug ospital. Apil usab niini ang pag-atiman sa mental health, emosyonal nga kahimtang, ug pagbati sa pagkahisakop sa komunidad.
Nagpasalamat usab ang gobernador sa mga partner nga organisasyon sama sa Cebu PRIDE Movement, JCI Cebu Lakan Bahaghari, ug Provincial Youth Development Office, ilabi na kang Dr. Brian To sa paggiya sa maong diskusyon nga importante alang sa tanang kabatan-onan.
Sa katapusan, gitambagan niya ang mga batan-on nga dili magdali ang gugma ug dili kini pugson. Ang tinuod nga gugma, matud pa niya, maghatag og kahigayonan nga motubo ug molambo ang usa ka tawo, dili ang pagkunhod sa iyang kaugalingon.
Source: Cebu Province PIO
I via Renante Socia Lada