Plano sa Provincial Government sa Cebu, ubos sa liderato ni Gov. Pamela Baricuatro, nga maghatag og medical scholarships alang sa mga estudyante nga gustong mahimong doktor ug andam nga moserbisyo sa mga pampublikong ospital sa lalawigan.
Pinaagi sa Piso Public Health Consultant nga si Dr. Elisse Nicole “Nikki” Catalan, naghimo ang Kapitolyo og usa ka scholarship program alang sa mga medical students sa pakigtambayayong sa Cebu Normal University–Vicente Sotto Memorial Medical Center College of Medicine (CNU-VSMMC COM). Tumong niini nga mas mapalig-on ug mapadayon ang serbisyo panglawas sa Cebu.
Bag-ohay lang, nakigtagbo si Dr. Catalan ug si Provincial Board Member Dr. Stanley Caminero sa mga opisyal sa CNU-VSMMC COM aron hisgutan ang kasabutan tali sa probinsya ug sa eskwelahan. Pinaagi niini, matabangan ang mga takos nga estudyante sa medisina bugti sa ilang serbisyo isip doktor sa mga ospital nga gipadagan sa Kapitolyo.
Ang scholarship program gitumong usab sa pagsulbad sa kakulang sa mga doktor ug healthcare workers, ilabi na sa mga lagyong barangay ug kulang og serbisyong medikal nga lugar. Matod ni Gov. Baricuatro, dili angay nga magkulang og mga doktor ang usa ka himsog ug progresibong Cebu.
Gipasalig sa CNU-VSMMC COM ngadto sa Kapitolyo sa kalidad nga edukasyon ug training nga ilang gihatag sa mga future doctors. Sumala ni Dr. Catalan, ang pagpamuhunan sa medical education usa ka direktang puhunan sa kaugmaon sa public health sa Cebu, nga magdala og mas maayo, sayon maabot, ug dekalidad nga serbisyong panglawas alang sa mga Sugboanon.
Source: Cebu Province PIO
I via Renante Socia Lada