Usa ka aksidente ang nahitabo kadlawon sa Disyembre 23, 2024, sa Barangay Tunghaan, Minglanilla, Cebu, diin usa ka minibus ang nalahos ug nabangga sa usa ka balay duol sa Gaisano Grand Minglanilla.
Matod sa imbestigasyon sa kapulisan, ang minibus nagbiyahe gikan sa habagatang bahin ug naglumba uban sa lain nga minibus sa dihang nawagtangan kini og kontrol. Ang minibus misulod sa pikas linya ug nidasmag sa balay nga naa sa daplin sa dalan.
Sa nasayran nga naangol ang upat ka biktima, lakip ang duha ka bata nga nag-edad og upat ug lima ka tuig. Ang mga biktima gihatod dayon sa ospital alang sa medikal nga atensyon. Maayo nalang nga walay nakalas nga kinabuhi sa maong insidente.
Ang drayber sa minibus nga si Eleodoro Codera anaa karon sa kustodiya sa Minglanilla Police Station alang sa imbestigasyon. Ang mga awtoridad nagpadayon sa ilang pagsusi aron masuta ang hinungdan sa aksidente ug aron maestablisar ang tanan nga kalabotan niini.
Ang kapulisan nag-awhag sa mga drayber nga mag-amping ug likayan ang mga delikadong binuhatan sama sa paglumba sa kalsada aron malikayan ang susamang mga insidente.