Kagahapong adlawa Disyembre 23, 2024, libo-an ka mga supporters ni dismissed Mandaue City Mayor Jonas Cortes nipadayag sa ilang suporta pinaagi sa usa ka prayer rally.
Didto kini sa Cebu International Convention Center (CICC) sa Mandaue City. Ang maong kalihokan gitambongan sa nagkalain-laing sektor gikan sa 27 ka barangay sa siyudad, lakip na ang mga senior citizens, kabatan-onan, mga trabahante sa transportasyon, mga PWD, mga miyembro sa LGBTQ+ community, ug mga residente, gi bana-bana nga dili mominos sa 15,000 sa mga tawo ang nitambong niini.
Sa iyang mensahe, si Cortes nipasalig nga makigbisog hangtod sa katapusan, ug nipahayag nga dili siya mahadlok nila Board Member Jonki Ouano, Lollipop Ouano-Dizon, ug House Speaker Martin Romualdez.
Ang rally usa ka tubag sa desisyon sa Commission on Elections (Comelec) Second Division nga ikanselar ang Certificate of Candidacy (COC) ni Cortes alang sa 2025 nga eleksyon tungod sa alegasyon sa ‘material and false representation’. Kini nagagikan sa usa ka petisyon nga gi-file ni Atty. Ervin Estandarte, nga nag-akusar kang Cortes sa seryosong misrepresentation pinaagi sa pag-angkon nga kwalipikado siya sa pagdagan bisan pa sa nagpadayon nga dismissal gikan sa serbisyo sa Ombudsman.
Si Cortes nag-file na og motion for reconsideration sa Comelec en banc niadtong Disyembre 23, 2024, ug nagpabiling kompyansa nga maapil siya sa opisyal nga listahan sa mga kandidato pagka-mayor sa umaabot nga eleksyon.
Nahubaw-an nga ang mga nisalmot sa rally nagdala og mga kandila ug nag-ampo alang sa usa ka patas nga proseso sa eleksyon, ug nag-awhag sa Comelec nga siguruhon nga ang 2025 nga eleksyon pagahimoon nga adunay hustong proseso, katarungan, ug katin-awan.
Ang kalihokan nagpakita sa dakong suporta alang kang Cortes ug sa ilang pagpanawagan alang sa kaangayan ug patas nga proseso sa eleksyon sa Mandaue City.
Hinuon sa maomg rally nagmalinawon kini pinaagi usab sa pag bantay sa mga sakop sa Mandaue City Police Office (MCPO). (Renante Socia Lada)