Patay diha-diha dayon ang usa ka babaye nga nagbuntis og lima ka buwan human gipusil sa wala matino nga suspetsado.
Pasado alas 8:30 kagabii, Oktobre 22, 2022, didto kini nahitabo sa Sitio Estaka Barangay Tunghaan, Lungsod sa Minglanilla, Probinsya sa Sugbo.
Ang biktima giila sa kapulisan sa Lungsod sa Minglanilla nga si Noraliza Baticura Awayas, 26 anyos ang panuigon,menyo, kanhi OFW ug residenti rapud sa maong lugar.
Segon ni PSSG Retchel Antipuesto ang imbestigador sa maong kaso nga samtang nagstorya ang biktima kauban ang iyang higala nga si Melody Resultas sulod sa iyang pinuy-an kalit kining gisulod sa wala matino nga suspetsado dayon gipusil nga naigo sa ulo nga maoy hinungdan sa iyang hinalaling kamatayon.
Sa nasayran basi sa pamahayag sa saksi nga ang mamumuno gi bana-bana nga adunay gitas-on nga 5’8, itumon, nagsuot og hood ug naka facemask.
Ang kapulisan nagpaubos pa sa background check sa biktima kung wala ba kini gikaaway.
Sa pagkakaron aduna na silay person of interest sa pagpusil patay ni Awayas ila usab gisubay karon ang personal grudge ang motibo sa maoy krimin. (Renante Lada)