Balligi a nairubuat ti “i police mobile app” iti Ilocos Norte Police Provincial Office.
Nagbalin a kangrunaan a sangaili ken nagsarita ni Gob. Matthew J. Marcos Manotoc ken inatendaran dagiti sumagmamano nga opisiales ti PGIN kangrunaanna kada Bise Gob. Cecilia Araneta Marcos kenni Provincial ABC Federated Pres. Elmer Faylogna pakairamanan dagiti sumagmamano a Department Head kas kada Provincial Social Welfare and Development Officer Mrs. Lilian Rin ken Local Disaster Risk Reduction Management Officer Mr. Marcell Tabije.
Ditoy nga impadanon ti gobernador ti napalaus a panagyaman ken panangkablaawna kadagiti adda iti likudan ti balligi a pannakairubuat ti baro nga “i police mobile app”.
Kangrunaan a nagyamananna ti pannakairaman dagiti serbisio ken contact number ti PGIN.
Sinaludaran ni Gob. Marcos Manotoc ti ganuat nga inpatungpal ti INPPO nangnangruna iti panangbuangayna ti ad-adu pay a linia ti komunikasion iti nagbaetan dagiti kakailian ken ti puersa ti pulisia.
Kabayatanna, impeksana ti napalaus a ragsakna iti pannakaiyawat ti sangapulo a “set” ti desk top computer iti INPPO manipud iti gobierno probinsial.
Mangnamnama ti gobernador a dakkel a makatulong dagitoy iti ad-adda pay a pannakapasayaat ti serbisio ti INPPO.
Impatalgedna ti agtultuloy a pannakibinnuligna ken ti sibubukel a gobierno probinsial iti Camp Valentin S. Juan para iti pannakaipasigurado iti panagtalinaed ti Ilocos Norte a maysa kadagiti katalnaan ken kalinakan a probinsia iti intero a pagilian. (Irene Ringor)
(Source: Provincial Government of Ilocos Norte)