Nagmalampuson ang operasyon sa kapulisan batok sa usa ka 46-anyos nga lalaki nga nasakpan nga nag-assemble og armas sa usa ka payag sa Barangay Masaba, Danao City, alas 11:55 sa gabii niadtong Biyernes.
Gipasiugdahan sa Danao City Police Station ang maong operasyon human madawat ang mga report kabahin sa ilegal nga aktibidad sa maong lugar. Naabtan sa akto ang suspetsado nga nagbuhat og armas gamit ang mga kagamitan nga makita ra mismo sa lugar.
Nakumpiskar sa operasyon ang duha ka wala mahuman nga pistola nga wala mailhi ang kalibre, duha ka barrel, duha ka buhing bala sa .45 caliber, duha ka magazine, ug daghang gamit sa paghimo og pusil.
Gipriso na karon ang suspetsado sa Danao City Police Station samtang gi- andam na ang pagsaka og kasong paglapas sa Republic Act 10591 o Comprehensive Firearms and Ammunition Regulation Act. Ang mga ebidensiya gibutang sa kustodiya alang sa hustong dokumentasyon ug disposisyon.
Gidayeg ni Police Brigadier General Redrico A. Maranan, Regional Director sa Police Regional Office 7 (PRO7), ang paspas ug epektibong aksyon sa kapulisan.
Nagpadayon ang PRO7 sa agresibong kampanya batok sa pagbuhat sa mga unlicensed firearms sa Central Visayas isip kabahin sa ilang paningkamot nga mapalig-on ang seguridad sa rehiyon.
Source: PRO7- PIO
I via Renante Socia Lada