Usa ka Chinese national ang nasikop sa mga operatiba sa Bureau of Immigration-Central Visayas (BI-7) human masakpi nga nagpakaaron-ingnon nga usa ka Filipino.
Gipahigayon ang operasyon niadtong Mayo 14, 2025, subay sa direktiba ni Presidente Ferdinand R. Marcos Jr. nga palig-onon ang depensa ug proteksyon sa soberanya sa nasud batok sa mga langyaw nga nalambigit sa ilegal nga kalihokan.
Ang suspetsado giila nga si Wang Chaoxin, 32 anyos, nga giingong nagdumala og usa ka trading company ug nagpaila sa iyang kaugalingon isip usa ka Pinoy.
Gidakop si Wang uban sa upat niya ka kauban nga mga Intsik, nga nasakpan nga nakalapas sa mga kondisyon sa ilang pagpuyo sa Pilipinas. Tulo kanila ang adunay working visa apan nagtrabaho sa kompanya nga wala sa ilahang gideklarar nga amo, samtang ang usa walay bisan unsang working permit.
Gihimo ang operasyon sa koordinasyon sa Armed Forces of the Philippines (AFP), National Bureau of Investigation (NBI) Cebu ug Manila offices.
Nagpadayag si BI Commissioner Joel Anthony Viado sa iyang pagsuporta sa kampanya sa gobyerno batok sa mga iligal nga langyaw nga kalihokan ug mipasalig nga padayon ang ilang operasyon aron mapalig-on ang seguridad sa nasud.
I via Renante Socia Lada