Ang Gobernador sa Bohol, Erico Aristotle Aumentado, nag-isyu og Executive Order No. 57 nga nagpatuman og diha-diha nga unom (6) ka bulan nga moratoryo sa mga aktibidad sa butakal nga for hire sa tibuok probinsya.
Kini nga lakang gibuhat aron mapugngan ang pagkatap sa African Swine Fever (ASF) human sa mga kaso nga natala sa Barangay San Vicente, San Miguel, ug Poblacion Sur, Batuan.
Ang imbestigasyon sa Office of the Provincial Veterinarian (OPV) nagpakita nga ang mga operasyon sa butakal nga for hire maoy usa sa mga hinungdan sa pagkatap sa ASF.
Gawas sa moratoryo, ang Gobernador usab nag-isyu og Executive Order No. 58 nga nagkinahanglan sa akreditasyon sa tanang hog traders nga nag-operate sa Bohol aron masiguro ang pagsunod sa mga biosecurity measures.
Ang mga lokal nga opisyal, Philippine National Police (PNP), ug Bureau of Animal Industry (BAI) gihatagan og responsibilidad sa pagpatuman sa moratoryo ug pagsiguro nga walay butakal nga for hire operator ang magpadayon sa ilang operasyon sulod sa gitudlong panahon.
Ang ASF usa ka seryosong hulga sa industriya sa baboy sa Bohol, nga nagkantidad og mga P6 bilyon.
Ang moratoryo ug uban pang mga lakang gipatuman aron mapanalipdan ang mga mag-uuma ug ang ekonomiya sa probinsya. (Renante Socia Lada)
(Source: Bohol Gob. Aris Aumentado)