Mipirma si Cebu City Mayor Raymond Alvin Garcia og usa ka executive order nga naglatid sa mga regulasyon alang sa mga establisemento sa negosyo atol sa Sinulog 2025.
Lakip niini ang mga balaod sa entertainment ug pagbaligya sa ilimnong makahubog. Gidili usab sa maong mando ang pagdumala og street parties aron mapadayon ang kahapsay sa maong gipaabot nga kalihokan.
Ang executive order nagmando sa pagdili sa pipila ka entertainment activities nga mahitabo sa rota sa solemn procession ug Sinulog parade sa tinakdang mga oras.
Ang gidili nga mga kalihokan sama sa mga konsiyerto, pasundayag, gigs, ug uban pang mga panghitabo nga naggamit og mga loudspeakers o sound systems dili tugotan gikan alas 6:00 sa buntag hangtod alas 8:00 sa gabii sa Sabado, Enero 18, ug gikan alas 12:01 sa kaadlawon hangtod alas 10:00 sa gabii sa Domingo, Enero 19, 2025.
Ang maong mando nagtinguha nga mapreserba ang pagkasagrado sa pagselebrar sa Fiesta Señor samtang masiguro ang luwas ug organisadong kasinatian alang sa mga partisipante ug sa motambong sa Sinulog. (Renante Socia Lada)
(Source: Cebu City PIO)