Mitanom og mga kahoy ang mga personnel sa Sindangan Central Fire Station sa Barangay Dagohoy, Sindangan, Zamboanga del Norte niadtong Hunyo 19 isip kabahin sa paningkamot sa pagpanalipod ug pagpreserbar sa kalikupan.
Gipangulohan ni FSINSP Francis Carl T. Paulite, Municipal Fire Marshal sa Sindangan, ang pag-apil sa maong kalihokan nga nagtumong sa pagtabang sa pagpahiuli sa kinaiyahan, pagpalig-on sa natural nga panalipod batok sa kalamidad ug pagpataas sa kahibalo sa komunidad bahin sa pag-atiman sa kalikupan.
Gipakita sa kalihokan nga dili lamang nakatutok ang Bureau of Fire Protection sa pagresponde sa sunog ug emerhensiya kondili usab sa pagsuporta sa mga programa alang sa kalikupan ug pagkunhod sa risgo sa mga kalamidad.
Padayon nga nagpalig-on sa panagtambayayong ang Sindangan Central Fire Station uban sa mga ahensya, organisasyon ug komunidad aron mapanalipdan dili lamang ang kinabuhi sa katawhan kondili usab ang kalikupan alang sa umaabot nga mga henerasyon.(JENIFFER JR. DELICA)
Source: BFP R9 Sindangan Municipal Fire Station v2