Gipadayag sa Bureau of Fire Protection Region 7 (BFP-7) nga padayon gihapon ang ilang pagpangita sa nawala nga bahin sa lawas ni Engr. Frederick Lee Deximo, bisan pa sa opisyal nga pahibalo nga na-recover na ang tanang 36 ka biktima sa trash-slide sa Barangay Binaliw.
Sumala sa BFP-7, kapin sa 28 ka personnel ang nagpadayon sa clearing operations sa lugar ug gitutokan ang pagpangita sa nawala nga bahin sa lawas sa biktima #27. Ang ubos nga bahin sa lawas ni Deximo nakuha niadtong Enero 15, 2026, apan wala pa makit-i ang uban nga bahin.
Una nang nagpadayag og kabalaka ang pamilya sa biktima. Matod sa iyang ig-agaw nga si Hannah Lee, ang nakuha lamang kay usa ka bahin sa lawas ni Deximo, ug giingon nga posible kini naapektuhan atol sa paggamit og heavy equipment sa paghawan sa debris.
Tungod niini, nagdumili ang pamilya sa pagdawat sa patayng lawas ug nagpahigayon og autopsy aron maklaro ang kahimtangan. Gipasalig sa BFP-7 nga magpadayon ang ilang paningkamot aron makompleto ang recovery ug matabangan ang pamilya sa paghatag og hustisya ug kahupayan.
Source: BFP-7
I via Renante Socia Lada