Mibisita si Belgian Ambassador Vladislava Iordanova uban sa lain pang opisyal kang Gob. Pamela Baricuatro niadtong Marso 17 aron hisgutan ang posibleng kolaborasyon tali sa Cebu Province ug mga European partners.
Sa tigum, gipakita ni Ambassador Iordanova ang interes sa pagtukod og long-term partnership sa probinsya, labi na sa pagpaambit og maayo nga praktis sa waste management ug water conservation, aron lig-onon ang international relations ug sustainable development.
Ingon usa ka maritime nation, andam usab ang Belgium sa pagtabang sa mga proyekto sa transportasyon. Gisulti ni Gob. Baricuatro ang plano sa pag-develop og community ports sa Cebu, lakip ang RoRo ug passenger ferry systems aron mapalambo ang inter-island connectivity.
Nangayo usab ang gobernadora og tabang para sa feasibility study sa coastal highways ug sa pagkompleto sa Metro Cebu Expressway, diin gipakita sa Belgian delegation ang kahingawa sa pagtabang pinaagi sa Public-Private Partnership (PPP).
Gihisgutan usab ang posibleng kolaborasyon sa maritime management, technical ug blue-collar training programs, ug mga environmental initiatives sama sa decarbonization ug carbon capture technologies alang sa sustainable fertilizer production.
Source: Cebu Province PIO
I via Renante Socia Lada