Nagkita ang mga opisyal sa Cordova nga gipangulohan ni Mayor Didoy Suan kang Gob. Pamela Baricuatro sa Provincial Capitol niadtong Marso 17 aron hisgutan ang paghuman ug pagpaandar sa Cordova Community Hospital.
Ang maong pasilidad planong mahimong usa ka 10-bed infirmary nga mohatag og serbisyo sama sa inpatient care, emergency, maternal ug pediatric services, ug ubang basic nga medical procedures alang sa mga residente sa Cordova.
Gipahayag ni Gob. Baricuatro ang iyang bug-os nga suporta sa proyekto ug giingon nga prayoridad sa iyang administrasyon ang pagpaayo sa serbisyo sa panglawas. Kung mahuman na ang ospital, makatabang kini sa pagkunhod sa mga pasyente nga ipadala pa sa dagkong ospital ug sa pagpagaan sa kadaghan sa pasyente didto.
Aron mapadagan ang ospital, nangayo ang lokal nga kagamhanan og pinansyal nga tabang alang sa pagpaayo sa imprastraktura, pagpalit og medical equipment, ug pagpalig-on sa diagnostic ug hospital systems.
Sumala ni Mayor Suan, ang building gitukod pa kaniadtong 2009 hangtod 2010 isip slaughterhouse ug gihimong ospital niadtong 2013. Apan wala kini dayon napaandar tungod sa problema sa right-of-way.
Gisaad sa lokal nga gobyerno nga bisan magsugod kini isip infirmary, andam na ang mga pasilidad aron mahimong Level 1 hospital sa umaabot. Samtang, gi-report usab nga ang ₱7.5 milyon nga drainage project sa lungsod anaa na sa 40 porsyento na ang nahuman.
Source: Cebu Province PIO
I via Renante Socia Lada