Cebu City – Dul-an sa lima ka tuig human gipatay si Bien Unido, Bohol Mayor Gisela Boniel, mi plead guilty ang iyang bana sa korte nga maoy mihimo sa krimen.
Gi-angkon ni Niño Rey Boniel, kanhi Bohol provincial board member ug laing upat, Martes Pebrero 8, 2022, didto sa Regional Trial Court Branch 70 sa syudad sa Lapu-Lapu nga duna silay kalambigitan sa pagpatay sa Gisela.
Miduso si Niño sa iyang guilty plea sa homicide case batok kaniya pinaagi sa plea bargaining agreement sa state prosecutors.
Matod ni Atty Virgil Ligutan, private prosecutor, gi sentensyahan si Nino ug walo ka tuig ug usa ka adlaw ngadto sa 14 ka tuig nga pagka bilanggo.
Duna pa hinooy gi-atubang nga laing kaso si Niño nga kidnapping ug serious illegal detention.
“Justice has been served,” mensahi ni Ligutan.
Kahinumduman nga si Roilito Boniel, ig-agaw ni Nino, mi testigo nga naka kita siya sa kanhi board member nga mipusil tumong sa ulo sa biktima, sa wa pa kini nila ihagbong sa kadagatan sa isla sa Caubian, Dakbayan sa Lapu-Lapu.
Niadtong tuig 2018, usa ka senior official sa Department of Justice mimando nga ipa withdraw ang kasong parricide batok ni Niño;
Apan human sa mga pagsaway, mi pirma ug resolution ang kaniadto Justice Secretary nga si Vitaliano Aguirre, pag bakwi sa maong withdrawal.
(News & photo courtesy of Regional Trial Court Branch 70)
