Gipasiugda ang kahinungdanon sa husto nga kahibalo, responsableng pagdesisyon ug aktibong partisipasyon sa kabatan-onan atol sa gipahigayon nga Linggo ng Kabataan Symposium nga nagtigom sa mga representante gikan sa nagkalain-laing sektor alang sa paghisgot paghisgot mahitungod sa legal nga isyu kabahin sa HIV kaniadtong Septiyembre 6,2026.
Gipangunahan ang kalihokan pinaagi ni HIV Program Coordinator Marlou Joseph P. Magtajas, RN, LPT, nga mipadayag og mga impormasyon kabahin sa sexually transmitted infections (STIs) ug HIV, lakip ang mga paagi sa paglikay niini ug ang importansya sa pag-atiman sa kaugalingong panglawas.
Gipunting usab sa symposium ang mga isyu nga direktang nakaapekto sa mga batan-on, ilabina sa ilang mga katungod, responsibilidad ug mga legal nga kabalaka.
Mitambong usab sa kalihokan si PAO Atty. Marga Manjaal-Seracho, PNP Deputy Chief PCPT Marvic L. Mapacpac, ug mga miyembro sa 2nd District YIGG ubos sa pagpanguna ni Rona Abatay.
Tumong sa maong kalihokan nga hatagan ang kabatan-onan og luwas nga luna diin sila makapangutana, makakat-on ug makasabot sa mga isyung may kalabotan sa ilang kahimsog, seguridad ug kaugmaon.
Gipasalamatan usab ang Barangay Government sa RG Macias, ilawom sa pagpanguna ni Barangay Captain Ritchie M. Su, alang sa pagdapit ug suporta sa programa, ingon man ang SK Chairperson Rosario E. Abapo sa pag-organisa sa maong kalihokan.
Gilauman nga pinaagi sa padayon nga edukasyon ug panag-uban sa mga ahensya ug sektor sa komunidad, mas maandam ang mga batan-on sa paghimo og husto ug responsable nga mga desisyon alang sa ilang kaugalingon ug sa komunidad.
Usa ka programang nagdala sa tema nga “Youth Advancing Multilateral Cooperation Through Technology and Partnership” nga nagpasabot sa hustong kahibalo mas andam nga mahimong responsable ug aktibong kauban sa pagtukod og mas luwas ug himsog nga komunidad alang sa kabatan-onan.(MEDALYN U. BORJA)
Source: RHU Sindangan