Nadakpan sa operasyon sa Criminal Investigation and Detection Group (CIDG)-7 Provincial Field Unit (PFU) NOPPO ang usa ka bana nga gi-reklamo sa iyang asawa nga kusog mani-on og armas de fuego. Ang operasyon nahitabo alas 9:34 sa buntag, Miyerkules, Disyembre 18, 2024, sa Purok Gabi, Barangay Banilad ning dakbayan sa Dumaguete.
Ang mga operatiba nagdala og search warrant nga giluwatan ni Judge Marie Rose G. Inocando-Paras, Executive Judge sa RTC Dumaguete City, kaniadtong Disyembre 16, 2024.
Ang nadakpan mao si Joseph Albert Ragot Lim, 47 anyos, minyo, ug usa ka negosyante sa lumber. Naposasan siya human masikop atol sa operasyon.
Sa pag-serve sa search warrant, nakuha gikan kang Lim ang mga mosunod: Usa ka caliber .45 pistol, usa ka caliber .45 pistol nga walay serial number, upat (4) ka steel magazines, baynte otso (28) ka bala para sa caliber .45, baynte (20) ka bala para sa caliber .38 revolver ug upat (4) ka kabhang sa caliber .38 revolver.
Sumala ni Police Major Nazarino Emia, hepe sa CIDG-PFU NOPPO, ang operasyon gihimo base sa reklamo sa asawa sa suspetsado nga ni angkon nga kini kanunay mani-on ug manghulga nga pusilon. Ang reklamo maoy hinungdan nga gi-apply ang search warrant sa korte.
Ang nadakpan mag-atubang ug mga kaso isip paglapas sa R.A. 10591 o Comprehensive Firearms and Ammunition Regulation Act, ug laing mga kalapasan nga mahimong madugang base sa imbestigasyon.
📸 CIGD-7
I via Renante Socia Lada