Patay ang usa ka 59-anyos nga babaye human maligsan sa usa ka dump truck atol sa aksidente nga nahitabo sa alas 4:50 sa hapon, Hulyo 12, 2025, sa Sitio Dilaan, Poblacion, Candijay.
Subay sa inisyal nga imbestigasyon sa Candijay Municipal Police Station nga gipangulohan ni PSMS Lemuel Dengrace Reyes ubos sa mando ni PCPT Marvin A. Chin, ang biktima nga giila nga si Nora Ampong, 59 anyos, angkas sa motorsiklo nga gimaneho sa usa ka school guard, padulong unta sa Poblacion Public Market.
Sa ilang pagbiyahe, nakasugat nila ang usa ka motorsiklo nga gimaneho sa giingong hubog nga drayber nga gikan sa Sitio Looc. Nasangit kini sa ilang sakyanan, hinungdan nga natumba sila sa kalsada.
Sa dihang natumba ang biktima, eksaktong miagi ang usa ka Sinotruck dump truck nga gimaneho sa usa ka 35-anyos nga lalaki nga taga-Guindulman, Bohol, ug aksidenteng naligsan ang ulo ni Ampong, hinungdan sa iyang grabeng kadaut.
Gidala dayon ang mga biktima sa Candijay Community Hospital apan gideklarar nga dead on arrival si Ampong ni Dr. Pristine Faith Sumera. Gikustodiya karon sa kapulisan ang tanang nalambigit sa insidente alang sa dugang imbestigasyon ug legal nga proseso.
📷 Candijay MPS-BPPO
I via Renante Socia Lada