Gipasaka na sa Police Regional Office 7 (PRO7) ug sa Anti-Cybercrime Group (ACG) ang kasong kriminal batok sa upat ka indibidwal nga nalambigit sa scam hub nga gi-raid sa I.T. Park, Lahug, Cebu City niadtong Marso 20, 2025.
Niadtong Hulyo 4, 2025, gipailan og pormal nga reklamo ang usa ka tawo nga giilang si alias “Tonying”, residente sa Lahug, Cebu, nga giingong operator sa scam hub. Giatubang niya ang mga kasong paglapas sa Section 8 ug 28 sa Republic Act 8799 (Securities Regulation Code) ug Section 11 (Investment Fraud) sa RA 11765 (Financial Products and Services Consumer Protection Act), nga konektado usab sa Section 6 sa RA 10175 o Cybercrime Prevention Act.
Sa laing bahin, niadtong Hulyo 11, 2025, ang tulo pa ka indibidwal nga giilang sila alias “Lerang”, “Yan-yan”, ug “Jeje”, mga residente sa nagkalain-laing barangay sa Balamban, Compostela, ug Cebu City, gipailan usab og kaso kalabot sa Section 11 sa RA 11765 nga may kalambigitan sa Cybercrime Prevention Act.
Padayon ang paningkamot sa mga otoridad sa pag-ila sa uban pang nalambigit sa maong iligal nga operasyon human makuha ang CCTV footage gikan sa lugar sa operasyon. Sa footage, nakit-an ang aktibong partisipasyon sa ubang tawo nga posible nga mga empleyado sa scam hub. Gipadayon ang imbestigasyon aron matugma ang ilang mga hitsura sa digital evidence ug personnel records.
Kon mapamatud-an nga sila ang responsable, posible silang masentensyahan og silot nga hangtod sa 21 ka tuig nga pagkabilanggo ug multa nga moabot sa lima ka milyon pesos. Ang mga kalapasan sa Securities Regulation Code ug Financial Products and Services Consumer Protection Act, ilabi na ang investment fraud ug pagbaligya og unregistered securities, giisip nga grabe nga krimen ilabi na kung kini gihimo pinaagi sa online platforms, nga mas gipagrabe pa ubos sa Cybercrime Prevention Act.
Matod pa ni Police Brigadier General Redrico A. Maranan, Regional Director sa PRO7, nga kini nga kaso nga gipasa usa lamang ka dakong lakang sa ilang mas halapad nga kampanya batok sa mga grupo nga nanikas sa katawhan.
Source: PRO7
I via Renante Socia Lada