Upat ka mga Regional Most Wanted Persons ang nadakpan sa sunod-sunod nga operasyon nga gihimo sa Police Regional Office 7 (PRO7) kaniadtong Oktubre 23, 2025.
Ang Top 4 Regional Most Wanted Person nadakpan sa mga sakop sa Carcar City Police Station samtang naa sa SM Seaside, Barangay Mambaling, Cebu City. Ang warrant of arrest giluwatan ni Judge Ernesto Engracia Narido sa RTC Branch 11, Carcar City, alang sa tulo ka kaso sa rape ug duha ka kaso sa acts of lasciviousness. Walay piyansa ang kaso sa rape samtang ₱200,000 ang piyansa matag kaso sa acts of lasciviousness.
Samtang ang Top 7, 8, ug 9 Regional Most Wanted Persons nadakpan sa Barangay Candulawan, Talisay City, pinaagi sa panaghiusa sa Provincial Intelligence Unit (PIU) sa Cebu PPO, Regional Intelligence Unit 7, Police Station 7 sa CCPO, ug Talisay City Police Station.
Ang Top 7 gilambigit sa kaso nga robbery with homicide ug robbery with serious physical injuries nga adunay piyansa nga ₱100,000. Ang warrant giluwatan ni Judge Stephen Ian T. Belacho sa RTC Branch 22 ug Judge Ramon Bueno Daomilas Jr. sa RTC Branch 11, Cebu City.
Ang Top 8 nasikop usab tungod sa warrant sa robbery with homicide, samtang ang Top 9 nadakpan sa kaso nga robbery with serious physical injuries, nga pareho usab adunay ₱100,000 nga piyansa.
Ang tanang nadakpan karon gibutang sa kustodiya sa ilang mga arresting units alang sa dokumentasyon ug ipasaka sa korte.
Gidayeg ni PBGen Redrico A. Maranan, Regional Director sa PRO7, ang hiniusa ug epektibong operasyon sa mga intelligence ug police units nga nalambigit.
“These arrests highlight our unwavering pursuit of wanted persons who continue to threaten the safety of our communities. Through sustained intelligence work and operational efficiency, we ensure that offenders face justice and that our people remain safe from further harm.”
Padayon ang PRO7 sa kampanya batok sa mga kriminal ug wanted persons sa tibuok Central Visayas aron mapadayon ang kalinaw, kahapsay, ug hustisya sa rehiyon.
Source: PRO7- PIO
I via Renante Socia Lada