Trahedya ang nahitabo sa Sitio Mangga, Barangay Bahay, Sibonga, Cebu, human mapatay ang usa ka 41-anyos nga asawa sa kamot mismo sa iyang bana tungod sa selos, pasado alas 5:00 sa buntag niadtong Hulyo 23, 2025.
Ang biktima giila nga si Catherine Sentillas, samtang ang suspetsado nga iyang bana giila nga si Benjamin Sentillas, 47-anyos. Silang duha pulos molupyo sa maong dapit.
Sumala sa imbestigasyon sa Sibonga Police Station, nagkabangi ang magtiayon human mihunong og trabaho ang bana ug nagsugod og duda sa iyang asawa, nga bag-o lang nakauli gikan sa Saudi Arabia isip overseas Filipino worker (OFW).
Sa kasuko ug kasina, gidunggab sa suspek ang iyang asawa gamit ang kutsilyo sulod sa ilang balay. Wala na kini maabot pa sa tambalanan human maangkon og grabeng samad.
Gidakop sa kapulisan ang suspek human sa insidente ug kasamtangang gitanggong sa kustodiya sa Sibonga Police Station samtang nagpadayon ang imbestigasyon ug pagpanday og kaso batok kaniya.
Gilauman nga pasakaan kini og kasong parricide. Ang kapulisan nanawagan sa publiko nga likayan ang bayolenteng paagi sa pagsulbad sa suliran sa pamilya ug magpabiling kalma ilabi na kung adunay panagbangi.
I via Renante Socia Lada