Nagpahimutang sa heightened alert ang Cebu Provincial Capitol sa pipila ka opisina ug mga ospital human sa report nga misaka ang polusyon sa hangin tungod sa grabeng kainit ug natanggong nga emissions. Kini usa ka lakang aron mapanalipdan ang panglawas sa publiko batok sa posible nga epekto sa hazardous haze.
Sumala kang Gobernador Pamela Baricuatro, gipangandaman na ang 12 ka distrito ug upat ka provincial hospitals alang sa posibleng pagdagsa sa mga magkasakit tungod sa dili maayong kalidad sa hangin. Ang maong direktiba gitumong aron masiguro nga andam ang mga health facilities sa bisan unsang emerhensiya.
Gipahibalo ni Provincial Information Office head Ainjeliz dela Torre-Orong nga ang Emergency Operations Center sa probinsya nag-operate na og 24/7 aron tutukan ang kahimtang. Giingon usab niya nga ang alert level kay pang-andam lamang ug dili angay ikahadlok sa publiko.
Samtang, nangayo og update ang gobernador gikan sa Department of Environment and Natural Resources ug sa Environmental Management Bureau bahin sa kahimtang sa hangin. Base sa ilang report, sukad Abril 17, 2026, naputos sa haze ang Metro Cebu ug misaka ang lebel sa PM2.5 nga delikado sa panglawas bisan pa og niubos gamay ang Air Quality Index ngadto sa 177.
Gipahimangnoan sa DENR-EMB ang publiko nga magpabilin sa sulod sa balay kung mahimo, likayan ang mga kalihokan sa gawas, ug magsul-ob og N95 o KN95 mask kung kinahanglan mogawas. Padayon ang pagmonitor sa gobyerno aron masiguro ang kaluwasan ug kahimsog sa mga residente.
Source: Cebu Province PIO
I via Renante Socia Lada