Usa ka lalaki ang gidakop sa kapulisan human giingong gipatay niya ang iyang kaugalingong amahan sa Barangay Sudlon 1, Cebu City.
Ang krimen nahitabo sa Sitio Alfagate niadtong Hulyo 10, 2025, apan nasayran lamang sa mga pulis pagkahuman og tawag gikan sa nagpakabanang silingan niadtong Hulyo 11.
Pag-abot sa kapulisan nga gipangulohan ni PCPT Wilmer M. Castillo sa Malubog Police Station 12, ilang nakaplagan ang patay’ng lawas sa usa ka 66-anyos nga mag-uuma. Aduna kini daghang samad sa ulo ug usa sa kamot.
Sumala sa mga testigo, nakita ang anak sa biktima nga naggunit og 15-pulgada nga sundang atong gabhiona. Nadungog pa ang amahan nga nangayo og tabang sa wala pa kini mamatay. Human sa insidente, mihawa dayon ang suspek.
Narekober sa kapulisan ang kutsilyo ngs giingong gigamit sa krimen. Niadtong Hulyo 13, nadakpan ang suspek sa Sitio Tabla sa follow-up operation. Gikumpiskar usab ang usa ka ginama nga kalibre .38 nga pistola nga puno pa og bala.
Mitug-an ang suspek nga siya migamit og iligal nga drogas. Karon, napriso na siya sa Malubog Police Station 12 samtang giandam ang mga pormal nga kaso batok kaniya.
Ang Cebu City Police Office nga gipangulohan ni PCOL Enrico Evangelista Figueroa mipasalig nga ipadayon ang pagpanalipod sa katawhan ug pagserbisyo aron makab-ot ang hustisya.
Source: CCPO
I via Renante Socia Lada
#rpndykccebu