Malampuson ang gipahigayon nga usa ka semana nga operasyon nga OPLAN BULABOG ug OPLAN BAKAL-SITA sa Cebu City Police Office (CCPO) gikan sa gabii sa Hulyo 7 hangtod Hulyo 14, 2025, nga nakaluwas sa 783 ka menor de edad ug nakahimo og 1,270 ka inspeksyon sa mga establisemento ug 683 ka inspection sa katawhan.
Gipangulohan ang operasyon ni PCOL Enrico E. Figueroa, Acting City Director sa CCPO, uban sa suporta ni PBGEN Redrico A. Maranan, Regional Director sa Police Regional Office 7 (PRO7). Uban sa partisipasyon sa tanang police stations sa siyudad, LGUs, ug mga force multipliers, gihimo ang operasyon sa tanang 80 ka barangay sa Cebu City.
Tumong sa Oplan Bulabog ang pagsiguro sa kaluwasan sa komunidad pinaagi sa hugot nga pagpatuman sa mga lokal nga ordinansa ug pagpugong sa kriminalidad. Labing dakong gihatagan og gibug-aton ang pagsalbar sa mga menor de edad nga nakalapas sa curfew ordinances, ug ang pagsusi sa mga establisemento aron masiguro nga nagtuman kini sa tanang regulasyon.
Gipasabot ni PBGEN Maranan nga ang presensya sa kapulisan sa mga lugar nga taas ang krimen makatabang sa pagpugong sa kadaot ug pagsiguro sa kalinaw sa komunidad. Gidayeg usab niya ang kooperasyon sa mga partner agencies ingon dakong bahin sa kalampusan sa operasyon.
Nagpadayag ang CCPO ug PRO7 nga ipadayon nila ang maong inisyatiba aron mapadayon ang kahapsay ug kaluwasan sa tibuok siyudad.
Source: CCPO
I via Renante Socia Lada