Paslak sa prisohan ang duha ka lalaki nga mag-amahan human masakpi sa ginapatuman nga hot pursuit operation sa Argao Police Station niadtong Lunes sa hapon, Hunyo 16, 2025, sa usa ka bukirang barangay sa maong lungsod.
Ang mga suspetsado nailhang sila alyas “Hudas”, 50 anyos, ug ang iyang anak nga alyas “Barabas”, 30 anyos. Pulos silang molupyo sa maong barangay ug giingong dugay nang gisumbong nga nagpakita og dili angay nga pamatasan.
Sumala ni Police Major Janus Giangan, hepe sa Argao Police, ang operasyon gikasa human misumbong ang usa ka inahan uban ang iyang 9-anyos nga anak nga babaye sa ilang buhatan. Ang bata, nga itago sa alyas nga “Girl”, mitug-an sa kasakit ug kalibog nga iyang nasinati sulod sa ilang balay.
Sa imbestigasyon, gisaysay sa bata nga samtang nagluto sa gawas ang iyang inahan niadtong Domingo sa hapon, gisulod siya sa iyang kwarto sa kapuyo sa iyang mama nga si Barabas ug gipahimuslan kini. Pagkahuman, misulod usab ang amahan ni Barabas nga si Hudas ug gibuhat ang susama.
Misibat dayon ang inahan ug ang biktima paingon sa police station aron isumbong ang pagpanamastamas nila.
Ang duha ka suspetsado kasamtangang gidetiner sa Argao Police Station ug mag-atubang og kaso nga Qualified Rape, nga usa ka kriminal nga kasong walay piyansa.
I via Renante Socia Lada