Nasikop ang giilang Top 2 Most Wanted Person sa Dakbayan sa Sugbo sa kusog nga operasyon sa mga sakop sa Criminal Investigation and Detection Management Unit (CIDMU) sa Cebu City Police Office (CCPO), niadtong Hunyo 13, 2025, sa Sitio Tabucanal, Barangay Basak San Nicolas, ning siyudad.
Ang suspek, 53 anyos, gidakop pinasikad sa Warrant of Arrest alang sa lima ka ihap sa kasong rape (5 counts of rape) nga gi-isyu sa Regional Trial Court Branch 47 sa Tagbilaran City, Bohol niadtong Hunyo 3, 2025. Walay girekomendar nga piyansa alang sa iyang temporaryong kagawasan. Ang mando sa operasyon gipangulohan ni PLTCOL Narciso C. Abapo, hepe sa CIDMU.
Gipahibalo dayon ang akusado sa iyang legal nga katungod ug gipailawom sa kustodiya sa CCPO, samtang nagpaabot sa legal nga mga proseso. Wala na siya makaikyas pa sa mga otoridad atol sa maayong koordinasyon ug intel sa kapulisan.
Gipadayag ni PCOL Enrico E. Figueroa, Acting City Director sa CCPO, ang iyang pagpasalamat ug pasidungog sa CIDMU personnel sa ilang walay puas nga paningkamot sa pagpangita sa mga wanted sa balaod, ilabi na sa mga kasong grabe ug sensitibo.
Gimandoan usab ni Col. Figueroa ang tanang kapulisan nga padayon nga palig-unon ang kampanya kontra kriminalidad, aron masiguro ang kalinaw ug kasiguruhan sa mga Sugboanon.
Source: CCPO
I via Renante Socia Lada