Cebu City – Pormal nang mipasaka si Lapu-Lapu City Mayor Junard “Ahong” Chan ug kasong perjury batok sa pito ka mga barangay kapitan kinsa unang misang-at ug kasong Malversation of Public Funds ug Anti-Graft and Corrupt Practices batok sa mayor, sa City Prosecutor’s Office.
Ang mga respondent sa kaso mao sila si Association of Barangay Council (ABC) President ug Bankal Barangay Kapitan Eduardo Cuizon, Gun-ob Barangay Kapitan Eleonor Fontanoza, Looc Barangay Kapitan Regina Ybanez, Tungasan Barangay Kapitan Tripornia Abayan, Subabasbas Barangay Kapitan Joselito Tibon, Canjulao Barangay Kapitan Reynaldo Tampus ug Maribago Barangay Kapitan Rosalino Abing.
Gihulagway ni Chan ang kaso nga gisang-at sa mga kapitan ngadto sa buhatan sa Visayas Ombudsman nga malisyoso ug himo-himo lang.
Gawas sa mayor, ang lain mga complainants naglakip nila ni Bids and Awards Committee Chairman Atty James Sayson ug mga membro nga sila si Ronald Malacora, Claire Cabalda, Romeo Berame; kanhi City Social Welfare and Development Office (CSWDO) head Ananbeth Cuizon; ug City Disaster Risk Reduction and Management Office head Nagiel Banacia.
Si Chan ug ang ubang mga complainants mi-atubang ni City Prosecutor Ruzo Zaragoza alang sa pagsang-at sa perjury complaint.
“So mao na’y giingon nga gibutang-butangan rata nila. Mao na’y nakita sa atong abogado nga kaso, puros pamakak, puros hinimo-himo, para lang madaot ang pangan sa usa ka tawo. Mao na ang perjury nga kaso,” mensahi ni Chan.
Kahinumduman, nga ang pito ka mga kapitan misang-at ug kasong Malverzation of Public Funds ug kalapasan sa Anti-Graft and Corrupt Practices Act batok sa mayor, gumikan sa alegasyon sa kwestoyable nga pagpamalit sa Coronavirus Disease 2019 (Covid-19) related items nga mobalor ug kapin sa ₱ 47 milyones.
Gi kwestyon sab ni Manlalaban Jorge Esparagoza, abogado ni Chan, ang timing sa pagpasaka ug kaso sa mga barangay kapitan.
“Why now that they filed this complaint? Four months before the election. They could have filed this within 2020 or 2021. But they did this deliberately and willfully as political manipulation and maneuver for purposes of the election. And that’s why we want to file this complaint to protect and vindicate the legal rights and interests of the mayor and to prove to the people of Lapu-Lapu City that these people are lying,” pangutana ni Esparagoza
Gawas pa niini, naglaraw sab si Chan nga mopasaka ug ksaong Oral Defamation ug Cyber Libel batok sa pito ka mga barangay kapitan.
Si Cuizon sa iyang bahin, mihangop sa kaso nga gisang-at sa mayor batok kanila.
“Ilaha pod nang katungod nga mo-alegar. Ang problema man gud ana pagmatuod nga among complaint is perjury or tumo-tumo. Wa koy problema ana tubagon rapod na namo kay ila mang gi-file. Ila man pod nang katungod dili mana nato sila mahikawan,” mensahi ni Cuizon. (Jhon Tadlip)
(News & photo courtesy of Lapu-Lapu City Public Information Office)
