Lima ka indibidwal ang nadakpan atol sa tibuok semana nga operasyon sa Cebu City Police Office (CCPO) batok sa iligal nga armas nga gipahigayon gikan Hulyo 7 hangtod Hulyo 13, 2025. Ang operasyon gipangulohan ni Acting City Director PCOL Enrico E. Figueroa, uban sa mga tinud-anay nga tinabangay sa mga police stations 1, 2, 5, 9, 10, ug sa City Intelligence Unit sa pagpangita og hustisya ug seguridad para sa mga Sugboanon.
Gikan sa mga search warrants nga gi-isyu sa Regional Trial Court Branch 17, gipahigayon ang synchronized nga operasyon sa nagkadaiyang barangay sa dakbayan. Ang mga nadakpan mao ang usa ka 29-anyos taga Barangay Lorega San Miguel, usa ka nailhan lang sa alyas nga ‘Insik’ sa Barangay Ermita, usa ka 28-anyos sa Barangay Sambag 2, si ‘Andoy’, usa ka 36-anyos construction worker sa Barangay Guadalupe, ug usa ka 26-anyos lalaki nga taga Barangay Tisa.
Nadakpan sila human makuhaan og mga armas de fuego ug mga bala nga giingong wala’y legal nga dokumento. Ang mga armas nga nakuha karon gisusi sa mga eksperto aron ma-establisar ang kalambigitan niini sa posibleng ubang krimen. Ang lima ka suspetsado silutan ubos sa Republic Act 10591, nga nagdili sa iligal nga pagpanag-iya ug paggamit sa armas ug bala.
Matod ni PCOL Figueroa, ang operasyon usa ka tin-aw nga mensahe nga ang kapulisan seryoso sa pagbungkag sa mga network sa iligal nga armas nga naghulga sa kalinaw ug kahapsay sa syudad. Gisiguro niya nga ang CCPO magpadayon sa ilang mga lakang aron malikayan ang paggamit sa armas sa krimen ug panagbangi.
Gipasidunggan usab ni PBGEN Redrico A. Maranan, Regional Director sa PRO7, ang tanang nitabang sa operasyon ug gipadayag ang suporta sa mga pulis sa Cebu City. Matod niya, ang maong panaghiusa sa tanang law enforcement agencies mao’y yawi aron mapadayon ang kaluwasan ug kasiguruhan sa komunidad.
Source: CCPO
I via Renante Socia Lada