Nadakpan sa mga kapulisan sa San Fernando Municipal Police Station ang usa ka wanted person atol sa operasyon nga gihimo sa Barangay South Poblacion, San Fernando, Cebu niadtong miaging adlaw.
Ang nadakpan mao ang usa ka 19 anyos nga construction worker ug residente sa Toledo City, Cebu. Gidakop siya tungod sa kasong paglapas sa Republic Act 8293 o Intellectual Property Code of the Philippines, ilabina sa kasong Trademark Infringement.
Giserbihan sa kapulisan ang suspek og warrant of arrest nga gi-isyu sa Regional Trial Court, Branch 65 sa Talisay City, Cebu. Ang piyansa alang sa maong kaso gitakda sa kantidad nga ₱30,000.
Human sa pagdakop, gipahibalo sa mga pulis ang suspek sa iyang katungod ubos sa balaod ug dayon gidala sa kustodiya sa San Fernando Municipal Police Station samtang gihulat ang pagturn-over kaniya ngadto sa korte nga nagpagawas sa warrant.
Gipasidunggan ni Cebu Police Provincial Office Director PCOL Abubakar Udang Mangelen Jr. ang mga operatiba sa malampusong pagpatuman sa warrant. Matud niya, nagpakita kini sa padayon nga paningkamot sa Cebu PPO batok sa kriminalidad ug sa pagdakop sa mga tawo nga adunay kaso aron maatubang nila ang balaod.
Padayon usab nga gipakusgan sa Cebu Police Provincial Office ang ilang manhunt operations isip suporta sa direktiba sa Police Regional Office 7 aron mapadayon ang kalinaw, kahapsay, ug kaluwasan sa tibuok lalawigan sa Sugbo.
📸 CPPO
I via Renante Socia Lada