Naulbo ang kahadlok sa Barangay Cotcot, Liloan, human mabiktima og holdap ang usa ka 64-anyos nga residente pasado alas-12:30 sa kadlawon, Agosto 24, 2025.
Ang biktima giila nga si Arthuro Tagalog Dacalos, minyo ug lumolupyo sa maong barangay. Nagmaneho kini og motorsiklo pauli sa ilang balay dihang kalit siyang giatangan sa duha ka batan-ong suspetsado sa daplin sa Cotcot River riprap.
Gihulga kini ug gikuhaan sa pitaka nga adunay ₱10,000 cash ug personal nga gamit. Nagpakilooy pa ang biktima, apan gisumbag hinoon siya sa mga suspek, hinungdan nga nasamad ang pikas kilay niini.
Human sa insidente, daling mikalagiw ang duha, apan pinaagi sa pagtabang sa mga barangay tanod, nadakpan ang usa ka suspetsado nga giilang si Armando Sacristan Vergara, 25 anyos, single, ug silingan ra sa biktima.
Sa pagkakaron, nagpabilin sa kustodiya sa Liloan Police Station si Vergara samtang gipangita pa sa kapulisan ang iyang kauban nga misibat.
I via Renante Socia Lada