Nadakpan sa Cebu Police Provincial Office (CPPO) ang 638 ka mga nakalapas sa lokal nga ordinansa atol sa 322 ka operasyon nga gihimo sa tibuok lalawigan sa Sugbo kagahapon Agosto 2, 2026, isip kabahin sa padayon nga Safer Cities Initiative.
Sa maong gidaghanon, 480 ka mga nakalapas gipamulta, samtang 158 ang gipasidan-an ug gipagawas sumala sa lokal nga ordinansa. Kadaghanan sa mga kaso may kalabotan sa paglapas sa traffic ordinansa, pag-inom og ilimnong makahubog sa pampublikong lugar, curfew sa mga menor de edad, pagpanigarilyo sa publiko, paglakaw nga walay sul-ob sa ibabaw sa lawas, pagpatukar og karaoke lapas sa gitugot nga oras, ug pagsul-ob og balaclava. Miabot sa ₱189,000 ang nakolektang multa.
Matud ni PCOL Abubakar Udang Mangelen Jr., Provincial Director sa CPPO, ang kampanya nagtumong sa pagpalig-on sa disiplina ug pagpugong sa krimen pinaagi sa patas ug padayon nga pagpatuman sa mga ordinansa.
Gidayeg usab ni PBGEN Arnold Evangelista Abad, Regional Director sa PRO7, ang paningkamot sa CPPO, samtang gipadayag ni Gobernador Pamela S. Baricuatro ang padayon nga suporta sa kagamhanan sa lalawigan aron mapadayon ang kalinaw ug kahapsay sa Sugbo.
I via Renante Socia Lada