Nadakpan sa Cebu Police Provincial Office (CPPO) ang 62 ka wanted persons, lakip na ang unom sa pinakagipangita, atol sa lima ka adlaw nga operasyon nga gitawag og One Time Big Time gikan Septyembre 8 hangtod 12, 2025.
Sumala sa police report, nakahimo ang CPPO og 65 ka operasyon ug nakapatuman og 76 ka warrants of arrest sa lain-laing bahin sa probinsya. Ang pipila sa nadakpan dugay na nga gipanid-an tungod sa seryosong krimen.
Gipasidunggan ni CPPO Officer-in-Charge, PCOL Abubakar Udang Mangelen Jr., ang paningkamot sa iyang mga tawo ug ang tabang sa komunidad. Giingon niya nga kini nga kalampusan nagpamatuod sa tinud-anay nga pagpaningkamot sa kapulisan nga ihatag sa korte ang tanang malapason sa balaod.
Ang Gobernadora sa Cebu, Hon. Pamela S. Baricuatro, mipadayag nga ang kalinaw ug kahapsay mao’y yawe sa kalamboan sa probinsya. Giila usab niya ang maayong panaghiusa tali sa probinsyal nga gobyerno ug kapulisan.
Gisaad sa CPPO nga ipadayon nila ang operasyon aron masiguro nga walay malapason sa balaod ang makalikay sa hustisya sa Cebu.
Source: CPPO
I via Renante Socia Lada