Padayon ang kampanya sa Cebu Police Provincial Office (CPPO) batok sa mga paglapas sa lokal nga ordinansa ug traffic regulations pinaagi sa ilang Safer Cities Initiative, diin 618 ka mga violators ang nadakpan sa nagkalain-laing operasyon sa tibuok lalawigan sa Sugbo kagahapon Hunyo 3, 2026.
Sumala sa CPPO, nakapahigayon sila og 208 ka anti-criminality operations. Lakip sa mga nakalapasan mao ang 370 ka traffic ordinance violations, 100 ka kaso sa pag-inom og makahubog nga ilimnon sa publiko, 75 ka curfew violations sa mga menor de edad, 38 ka tawo nga nagsuroy nga walay sinina sa ibabaw nga bahin sa lawas, 30 ka kaso sa pagpanigarilyo sa publikong lugar, ug 5 ka kaso sa paggamit og karaoke lapas sa gitakdang oras.
Sa kinatibuk-an, 370 ka violators ang gipamulta samtang 248 ang gipahimangnoan ug gipagawas human sa dokumentasyon ug orientation.
Mikabat sa ₱166,850 ang nakolektang multa. Giingon ni CPPO Director PCOL Abubakar Udang Mangelen Jr. nga ang maong programa dili lamang alang sa pagpatuman sa ordinansa kondili usa usab ka paagi aron mapalig-on ang disiplina ug kalinaw sa komunidad. Gidayeg usab ni PRO7 Director PBGEN Arnold Evangelista Abad ang dedikasyon sa mga pulis, samtang gipasiugda ni Gobernadora Pamela Baricuatro nga importante ang kooperasyon sa gobyerno ug katawhan aron mapadayon ang kaluwasan ug kahapsay sa tibuok Sugbo.
📸 CPPO
I via Renante Socia Lada