Nadakpan sa kapulisan ang usa ka 21 anyos nga lalaki ug nasakmitan og usa ka ilegal nga pusil ug mga bala atol sa operasyon sa Barangay Bolinawan, Carcar City kagahapon Hunyo 3, 2026.
Base sa report, alas-8:00 sa gabii dihang usa ka concerned citizen ang mitawag sa pulis human makakita og armadong tawo sa Sitio Relis Cambuntan. Dali dayong miresponde ang mga sakop sa Carcar City Police Station aron susihon ang maong impormasyon.
Pag-abot sa mga pulis sa lugar, ilang nadakpan ang suspetsado mga alas-8:30 sa gabii. Nakuha gikan kaniya ang usa ka caliber .22 revolver nga adunay tulo ka buhing bala.
Matud sa kapulisan, napakyas ang lalaki sa pagpakita og legal nga dokumento nga nagtugot kaniya sa pagpanag-iya sa maong pusil. Tungod niini, gipadanginlan siya og paglapas sa Republic Act 10591 o ang
Comprehensive Firearms and Ammunition Regulation Act.
Gipasabot usab sa mga pulis ang suspetsado sa hinungdan sa iyang pagdakop ug sa iyang mga katungod ubos sa balaod sa pinulongang iyang nasabtan. Dayon gidala siya sa Carcar City Police Station alang sa hustong dokumentasyon ug pagsang-at sa kaso.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang maong concerned citizen ug ang mga pulis nga paspas nga mitubag sa report. Matud niya, dakong tabang ang kooperasyon sa komunidad aron mapadayon ang kalinaw ug kahapsay sa mga barangay.
Padayon usab ang kampanya sa CPPO batok sa mga loose firearms ug ilang gihangyo ang mga tag-iya sa pusil nga mosunod sa tanang balaod ug regulasyon kabahin sa pagpanag-iya og armas.
I via Renante Socia Lada