Nakumpiskar sa mga pulis sa Bogo City Police Station ang mga ilegal nga pusil ug mga bala atol sa pagpatuman og search warrant sa Barangay Libertad, Bogo City, Cebu niadtong nakalabay nga mga adlaw.
Sa operasyon, nadakpan ang usa ka 41-anyos nga lalaki ug narekober gikan kaniya ang usa ka 9mm pistol nga adunay magazine ug 41 ka buok bala, usa ka .38 caliber revolver nga adunay lima ka buok bala, ug mga bag nga gigamit sa pagtago sa mga armas ug bala.
Gipahigayon ang operasyon base sa search warrant nga gi-isyu sa Regional Trial Court sa Bogo City tungod sa giingong paglapas sa Republic Act 10591 o Illegal Possession of Firearms.
Matod ni Cebu Provincial Police Office Director PCOL Abubakar Udang Mangelen Jr., dakong tabang ang pagkumpiskar sa mga ilegal nga armas aron mapugngan ang krimen ug mapadayon ang kalinaw sa komunidad. Ang mga nakumpiska nga ebidensya gidala sa Bogo City Police Station samtang giandam na ang kaso batok sa nadakpan nga suspek.
I via Renante Socia Lada