Nagmalampuson ang gihimo nga buy-bust operation sa mga sakop sa Provincial Intelligence Unit (PIU) ug Provincial Drugs Enforcement Unit (PDEU) sa CPPO batok sa usa ka babaye nga tigpayuhot og ginadiling drugas.
Ang pagkasikop nahitabo pasado alas 5:30 kagahapon sa hapon, December 14, 2022, didto sa Upper Bayong Barangay Inayagan, Siyudad sa Naga.
Giila ang suspetsado nga mao si Maria Victoria Cabaron Ledesma, 28 anyos ang panuigon, High Value Individual, dalaga, a.k.a “Yadni”, lumulupyo sa Belgium Street Barangay.Suba, Dakbayan sa Sugbo.
Mga binultong shabu ang nakuha sa iyang posisyon nga may timbang nga usa ka kilo ug street value nga P6.8 million.
Si Police Lieutenant Christopher Torregosa, CIU sa CPPO nibutyag nga nikabat og tulo ka semana ang ilang pagmonitor sa suspetsado usa gipahigayon ang maong drug operation.
Dugang ni Torregosa nga si Ledesma matud pa makabaligya kini og usa ngadto sa duha ka kilo sa ginadiling drugas matag semana.
Gilauman nga aduna pay daghang anti-drug operation sa kapulisan labi na niining nagsingabot nga pasko nga taas ang demand sa ginadiling drugas. (Renante Lada, photo courtesy of CIU | PDEU CPPO)