Gidakop sa kapulisan sa Carmen Municipal Police Station ang usa ka lalaki human giingong nalambigit sa kaso sa rape sa Sitio Bagakay, Barangay Cantumog, Carmen, Cebu sa sayong bahin karong buntag Hulyo 4, 2026. Atol usab sa operasyon, nakuhaan ang suspek og usa ka giingong walay lisensya nga AR-15 rifle ug usa ka 7-pulgadang hinagiban.
Sumala sa kapulisan, nakadawat sila og report mga alas-1:30 sa kadlawon ug dali silang miresponde sa lugar. Human sa inisyal nga imbestigasyon ug positibong pag-ila sa biktima sa suspek, nadakpan kini mga alas-1:50 sa kadlawon.
Atol sa legal nga pagdakop, narekober sa mga operatiba ang usa ka AR-15 rifle nga adunay magasin nga gisudlan og usa ka buhing bala, ug usa usab ka 7-pulgadang hinagiban nga anaa sa posesyon sa suspek.
Gipahibalo usab siya sa iyang mga katungod ubos sa Miranda Doctrine ug Anti-Torture Act sa pinulongang iyang nasabtan sa wala pa dad-a sa estasyon sa pulis alang sa hustong dokumentasyon ug kustodiya.
Giandam na sa kapolisan ang mga kasong kalabot sa giingong paglapas sa Republic Act No. 8353 o Anti-Rape Law of 1997 ug Republic Act No. 10591 o Comprehensive Firearms and Ammunition Regulation Act batok sa suspek.
Gipasidunggan ni CPPO Provincial Director PCOL Abubakar Udang Mangelen Jr. ang mga pulis nga dali nga miresponde sa insidente. Matud pa niya, magpadayon ang Cebu Police Provincial Office sa pagpanalipod sa kababayen-an ug kabataan, pagbatok sa kriminalidad ug ilegal nga armas, ug pag-awhag sa publiko nga dayong ireport sa kapulisan ang bisan unsang insidente aron matagan dayon og angay nga aksyon.
📸 CPPO
I via Renante Socia Lada