Nakasikop ang Cebu Police Provincial Office (CPPO) og 520 ka indibidwal tungod sa lain-laing paglapas sa local ordinances atol sa 300 ka operasyon sa tibuok Cebu kagahapong adlawa Agosto 28, 2026.
Sa 520 nga nasikop, 340 ang gipamulta ug 180 ang gipasidan-an o gipagawas. Mokabat sa ₱216,350 ang nakolektang multa.
Kadaghanan sa mga paglapas kay traffic ordinances nga mikabat og 340 ka kaso. Lakip usab ang paglapas sa curfew sa 59 ka menor de edad, pag-inom og alkohol sa publikong lugar, pagpanigarilyo sa publikong lugar, ug paglaag nga walay saplot sa ibabaw.
Ang Toledo City Police Station ang nakarekord sa pinakadaghan nga nasikop nga mikabat og 50, gisundan sa Bogo nga 47 ug Talisay nga 31.
Matud sa CPPO, ipadayon nila ang mas hugot nga police visibility ug pagpatuman sa mga ordinansa aron mapadayon ang kalinaw, kahapsay ug kaluwasan sa mga Cebuano.
📸 CPPO
I via Renante Socia Lada