Gisugdan na sa Police Regional Office 7 (PRO7), sa pakigtambayayong sa Technical Education and Skills Development Authority (TESDA), ang siyam ka adlaw nga Proficiency Driving Training alang sa 50 ka mga drayber sa sakyanan sa Philippine National Police gikan sa nagkadaiyang police units sa Central Visayas.
Tumong sa maong pagbansay ang pagpalambo sa kahibalo ug kahanas sa mga pulis sa luwas ug husto nga pagmaneho sa mga sakyanan sa kapulisan.
Lakip sa ilang tun-an ang defensive driving, pagsunod sa balaod sa dalan, hustong paggamit sa police vehicles, ug responsableng pagmaneho aron mas andam sila sa pagresponde sa mga emerhensiya ug uban pang operasyon.
Matod ni PRO7 Regional Director PBGEN Arnold E. Abad, importante kaayo ang husto nga pagmaneho sa epektibong pagpatuman sa katungdanan sa mga pulis. Miingon siya nga ang matag police driver adunay responsibilidad sa pagpanalipod sa iyang kaubang pulis, sa mga sakyanan sa gobyerno, ug sa pagsiguro sa kaluwasan sa publiko.
Sulod sa siyam ka adlaw nga pagbansay, ang TESDA maghatag og mga lecture, practical exercises, ug competency assessment aron masiguro nga ang mga partisipante makab-ot ang nasudnong sumbanan sa propesyonal nga pagmaneho.
Gidasig usab ni PBGEN Abad ang mga partisipante nga seryosohon ang pagbansay aron mas mapalig-on ang ilang ka-andam sa pagserbisyo ug pagpanalipod sa katawhan.
📸 PRO7
I via Renante Socia Lada